БИШКЕК, 29-май — Sputnik. Кыргызстандын Куралдуу күчтөрүнүн түзүлгөндүгүнүн 30 жылдыгына арналган салтанаттуу жыйынга катышкан президент Садыр Жапаров өлкөнүн коргонуу жөндөмдүүлүгүн стратегиялык жактан өнүктүрүү боюнча пландарды белгиледи.
Мамлекет башчынын маалымат кызматы салтанаттын Бишкек шаарындагы Токтогул Сатылганов атындагы Кыргыз улуттук филармонияда өткөнүн кабарлады.
"Жапаров Куралдуу күчтөрдүн аскер кызматкерлерин жана ардагерлерин мааракелик дата менен куттуктап, эгемендүүлүк жылдарында армиянын жетишкендиктерин белгилеп, өлкөнүн коргонуу жөндөмдүүлүгүн стратегиялык жактан өнүктүрүү боюнча пландарды белгиледи", — деп билдирди маалымат кызматы.
Ал кызматтык милдеттерин ак ниет аткаргандыгы, үлгүлүү аскердик тартиби, күжүрмөн даярдыктагы мыкты көрсөткүчтөрү үчүн, ошондой эле Куралдуу күчтөрдүн 30 жылдыгына карата өзүнүн атынан төмөнкү аскер кызматкерлерине ыраазычылык билдирген:
полковник Мурат Оторовго;
подполковник Эрмек Асановго;
капитан Бакытбек уулу Нурсейитке;
капитан Кубатбек уулу Бексултанга;
ага лейтенант Адылбек Кочкоровго.
Жапаров филармониянын залындагы тематикалык сүрөттөрдү карап, көргөзмөнү, ок атуучу куралдардын, инженердик жабдуулардын жана радиостанциялардын көргөзмөсүн кыдырып чыккан.
Салтанат Кыргызстандын эстрада артисттеринин майрамдык концерти менен жыйынтыкталган.