БИШКЕК, 26-май — Sputnik. Аламүдүн районунун Пригородное айыл аймагынын кирешелер боюнча башкы адиси О.К.Т. жасалма дипломун жашыруу үчүн пара берип жаткан жеринен кармалды. Бул тууралуу УКМКнын маалымат кызматы кабарлады.
Билдирмеге караганда, айыл өкмөт адиси жогорку билими тууралуу дипломунун аныктыгын текшерүүнү токтотуу үчүн УКМК кызматкерине пара катары 160 миң сом сунуштаган.
"24-майда жүргүзүлгөн ыкчам иликтөө иш-чараларынын натыйжасында атайын кызматтын өкүлүнө пара берип жаткан жеринен Пригородное айыл аймагынын кирешелер боюнча башкы адиси колго түшүрүлдү", — деп айтылат маалыматта.
Азыркы учурда тиешелүү тергөө иштери жүргүзүлүп жатат.