БИШКЕК, 23-май — Sputnik. Кыргызстанда иштеп жаткан жеке клиникалардын лицензиясы бар-жогун сөзсүз караш керек. Бул туурасында Саламаттык сактоо министрлигинин Медициналык жардамды уюштуруу жана дары саясаты боюнча башкармалыгынын башкы адиси Гүласыл Сутуева Sputnik Кыргызстан агенттинин маалымат борборунда өткөн брифингде айтып берди.
Анын билдиргенине караганда, уруксат берген документ медициналык мекеменин алдында илинип турушу кажет.
"Биринчи иретте кардар жеке клиниканын тиешелүү лицензиясы барбы, жокпу, ага көңүл буруу зарыл. Документ көрүнүктүү жерде илинип турушу лаазым. Анда эмне жазылгандыгын ар бир пациент көрүүгө акылуу. Дагы бир маанилүү учур — сиз бара турган мекеменин лицензиясында башка кызматтарды көрсөтүү боюнча көрсөтүлсө, анда башка клиникага барган оң", — деп белгиледи Сутуева.
Ал көп учурда министрликтин сайтында лицензиясы бар клиникалардын тизмеси ачык жазылып турарын, кааласа аны ар бир кыргызстандык окуй аларын билдирди.
Сутуева текшерүү процедурасы боюнча да айтып берди. Текшерүүдөн кийин комиссия лицензиялуу клиникаларга эгер мыйзам бузууларды оңдоого мүмкүн болсо, ага тиешелүү бир мөөнөт коет. Ал эми лицензиясы жок иштеп жаткан клиникалар боюнча ишти андан ары терең караш үчүн тартип коргоо органдарына өткөрүп берет.
Өлкөдө гепатит көп катталып кеткендиктен аталган министрлик менчик клиникаларды, дарыканаларды, стоматологиялык жана косметологиялык борборлордун лицензиялык талаптарга жоп берер-бербесин текшере баштаган.
Анын жыйынтыгы боюнча 84 дарыкана, 27 косметикалык салондун уруксаты жок иштеп жатканы аныкталды. Мындан сырткары, лицензиялык талаптарга жооп бербегендиктен өлкөдө 111 менчик медициналык кабинет жабыла турган болгон.