БИШКЕК, 20-май — Sputnik. ЖКККББ начальниги Азамат Исраилов Евразиялык экономикалык форум учурунда кайсы жолдор жабылып, кандай чектөөлөр болорун маалымат жыйын учурунда билдирди.
Белгилей кетсек, форум 26-майда Бишкек шаарында өтөт. Исраилов жол кыймылына чектөө канча күн кирерин так айткан эмес.
"Жолдор узак убакытка жабылбайт, кортеж өткөн маалда гана тосулат. Иш-чара жумуш күнүнө туура келгендиктен, азыртан даярдык көрүп жатабыз. Көчөлөр кыска убакытка гана жабыларын эскертип коёюн", — деди Исраилов.
Анын айтымында, негизги маршрут "Манас" аэропортунан башталып Бишкектин Жибек жолу, Жаш гвардия, Чүй, Айтматов проспектилерине чейин созулат. Мындан тышкары, Абдрахманов көчөсү запаста.
"Бул көчөлөрдү кесип өтчү автоунааларды кыска убакытка, мисалы, 5-10 мүнөткө коё берип турабыз", — деди ал.
Исраилов көпчүлүк "Коопсуз шаардын" камералары ал күнү кандай иштээрин сурап жатканын белгилеген.
"Мындай иш-чаралар болгон күндөрү жол кыймылы кол менен жөнгө салынат. Ошол себептен айдоочулар кыймылды көзөмөлдөп, жөнгө салган кызматкерге баш ийиши керек. Мында жол чырактын кызыл түсүнөн өтүп кетүү сыяктуу эреже бузууларга айып салынбайт. Айрым учурда камера каттап калышы ыктымал. Эгер ошол күнү айып жазылып калса, айдоочу мониторинг борборуна кайрылышы керек. Белгилей кетсем, мындай эреже делегация өтчү жолдордо гана колдонулат", — деген ал.
Буга чейин ЖКККББнын маалымат кызматы 26-27-майда Бишкек менен Чүйдө жол кыймылына чектөө киргизилерин эскерткен. Евразия экономикалык биримдигине быйыл Кыргызстан төрагалык кылат.