БИШКЕК, 9-май — Sputnik. Россиянын элчиси Николай Удовиченко кыргызстандыктарды Жеңиш күнү менен куттуктады. Бул тууралуу РФ өкүлчүлүгүнөн кабарлады.
Элчи Россияда, Кыргызстанда жана башка өлкөлөрдө согуш талаасында, оорукта каны-жанын аябаган баатырлардын элеси түбөлүккө сакталарын эске салды.
"Бүгүн биз жаңы геосаясий реалдуулук менен күрөшүп жатканыбызда ата-бабаларыбыздын эрдигин эске салуу, тарыхты бурмалоого жана Улуу Ата Мекендик согуштун жыйынтыктарын кайра жазууга каршы турушубуз керек", — деди Удовиченко.
Ошондой эле элчи немец баскынчыларына каршы күрөшкө салым кошкон кыргыз элинин туруктуулугун жана эрдигин жогору бааларын айтты.
"Улуу Ата Мекендик согуш жылдарында ар бир төртүнчү кыргызстандык Кызыл Армиянын катарына тартылган. Жалпысынан 363 миң адам, алардын көбү өз ыктыяры менен фронтко кеткен. Кеткендердин 71и Советтер Союзунун Баатыры, дагы 21и Даңк орденинин ээси. 1941-жылы ноябрда Орто Азияда түзүлгөн Панфилов дивизиясынын эрдиги ар дайым эсибизде", — деди элчи.
Эске салсак, быйыл Улуу Жеңиштин 77 жылдыгы белгиленип жатат.
Улуу Ата Мекендик согуштагы Жеңиштин 77 жылдыгына арналган "Өлбөс полк" акциясынын жүрүшүн Sputnik Кыргызстандын онлайн-репортажынан көрүүгө болот.