БИШКЕК, 29-апр. — Sputnik. Президент Садыр Жапаров бүгүн "Манас айылы" этнографиялык комплексин реконструкциялоо боюнча долбоор менен таанышты. Бул тууралуу мамлекет башчынын маалымат кызматы билдирди.
Долбоорго ылайык, "Манас айылынын" аймагы үч гектардан сегиз гектарга чейин кеңейтилет. Ар кандай жыйындарды, курултайларды жана башка иш-чараларды өткөрүү үчүн залдарды камтыган үч кабаттуу боз үй куруу пландалууда. Ошондой эле комплекстин аймагына "Манас" театры менен "Манас" музейин жайгаштыруу каралган.
Мындан тышкары, комплекстин коноктору үчүн улуттук каада-салттарга, ырым-жырымдарга ылайык этномаданий иш-чаралар өткөрүлмөкчү.
Президент архитекторлорго кайрылып, бул иштерди аткарууда ар тараптан ойлонуштурулуп кылдат мамиле жасоонун зарылдыгын белгилеген. Аны менен катар курулуш иштерин тез арада баштоону буйруган.
Ошондой эле комплексти стандартка ылайык сапаттуу куруу жана келгендерге ыңгайлуу шарттарды түзүү боюнча тиешелүү мамлекеттик органдарга тапшырмалар берилгени айтылды.