БИШКЕК, 28-мар. — Sputnik. Кофени шоколад жана алкоголдук ичимдиктер менен аралаштырганга болбойт. Бул тууралуу гастроэнтеролог, диетолог Нурия Диановага шилтеме берип "Известия" жазды.
Адис бул азыктар аралашканда кызыл өңгөчтүн ашказан менен туташкан жердеги жыйрылуусу анчейин болбой зарна жаралып, оозго ачуу даам келерин түшүндүрдү. Мындай ыңгайсыздык кээде дароо билинет, айрым учурда кесепетин кийин тарттырат.
Адистин айтымында, кофени эт жегенден кийин ичсе жакшы.
"Эспрессодо тамак сиңирүү процессин жакшыртуучу органикалык кислоталар бар. Ал ашказанда этти жакшы сиңирет", — деген Дианова.
Диетолог ошол эле учурда эспрессо кофесинен кийин бир стакан суу ичип коюуну сунуштады. Кофе заараны көп чыгаргандыктан организмди суюктукка толтуруу керек.