БИШКЕК, 26-мар. — Sputnik. Мамлекетке 500 миң доллар инвестиция салган чет элдиктерге Кыргызстандын жарандыгын жөнөкөйлөтүлгөн тартипте берүү боюнча мыйзам долбоору сунушталды.
"Инвестициялар үчүн Кыргыз Республикасынын жарандыгы жөнүндө" деп аталган документти Жогорку Кеңештин депутаты Медер Алиев демилгелеп, коомдук талкууга чыгарды.
Максаты — Кыргызстанга каражат тартуу жана инвестициялык абалды жакшыртуу. Анткени жарандык алуу үчүн чет өлкөлүк жана жарандыгы жок адам өлкө аймагында жашоого, мамлекеттик же расмий тилди билүүгө милдеттүү болбойт. Бирок аларга материалдык түрдө талаптар коюлууда, аларды аткаруу менен Кыргызстандын экономикасынын өнүгүүсүнө салым кошушат.
Инвестициялар үчүн жарандык алган адамга КРге тоскоолдуксуз келип-кетүүгө шарт түзүп, бул жакта банктык операцияларды жүргүзүүдө, салык төлөөдө жеңилдиктер каралат.
Жарандык алуунун "акысы"
Биринчи болуп жарандык алууну каалаган чет элдик Кыргызстанга 500 миң доллардан кем эмес инвестиция салышы шарт. Эгер анын үй-бүлө мүчөлөрү да кыргыз жараны болууну кааласа, төмөнкүдөй суммада инвестиция кылышы керек:
ата-энеси (атасы, апасы) – 50 000 доллар;
Жубайы – 50 000 доллар;
18 жашка чыга элек балдары – ар бири 20 000 доллардан.
Атуулдук берүүдө мамлекеттик пошлина 3 000 доллар, эгер чет өлкөдөгү элчилик аркылуу кайрылса, консулдук пошлина 5 000 долларды түзөт.
Инвестициялар үчүн жарандык алуу үчүн төмөнкү тармактарга беш жылдан кем эмес убакытка каражат салуу талап кылынат:
Кыргызстандын банктарына депозит салуу;
Кыймылдуу же кыймылсыз мүлктү, анын ичинде коммерциялык уюмдардын мүлкүндөгү акцияларды, үлүштөрдү менчикке сатып алуу;
IT-индустриясындагы стартаптарга жана экономиканын башка тармактарына;
Өлкөнүн айрым аймактарын өнүктүрүү үчүн министрлер кабинети тарабынан иштелип чыккан инвестициялык программаларга.
Демилгечи депутат мындай тажрыйба Россия, Австрия, Болгария, Камбоджа, Иордания, Мальта, Черногория жана Түркия сыяктуу мамлекеттерде да колдонуларын жазган.