БИШКЕК, 18-мар. — Sputnik. Бишкекте бир нече күн мурун Кыргыз улуттук "Манас" театры имараттуу болгон.
Театрга имарат катары мыйзамсыз байыган деп айыпталган Жогорку Соттун мурдагы судьясы Камил Осмоналиевдин хан сарайы берилген. Үй Бишкектин түштүгүндөгү VIP-шаарчада.
Театр 2021-жылдын сентябрь айында "Манас" эпосун, ошондой эле кенже эпосторду жана манасчы, дастанчылардын чыгармачылыгын сактоо, жайылтуу максатында негизделген. Президенттин 2022-жылдын 17-февралдагы жарлыгы менен ага улуттук макам ыйгарылган. Жетекчиси — манасчы Азиз Биймырза уулу.
Sputnik агенттигинин чыгармачыл тобу VIP-шаарчадагы эки кабаттуу үй маданий жайга кантип айланганын көрүп келди.
Имараттын биринчи кабатында 30 кишиге ылайыкташкан кичи сахна жайгашкан, бул жакта чыгармачыл кечелерди уюштурууга болот. Экинчи кабатта театр администрациясынын иш бөлмөлөрүн көрүүгө болот. Конфискацияланган үйдө бардык керектүү буюм-тайым, анын ичинде эмеректер бар.
Театрдын жетекчиси Азиз Биймырза уулунун айтымында, штатта башында 33 киши болсо, азыр 83кө жетти. Ал айлык акы да жогорулаганын, каржы маселеси менен Маданият министрлиги алектенерин айтты.
Ошондой эле театр башчысы жакынкы аралыкта Борбор Азиянын өнөрпоздорунун катышуусунда айтыш уюштуруу пландалып жатканын жана Түркияда өтө турчу Дүйнөлүк көчмөндөр оюндарына даярдык башталарын кошумчалады.
Камил Осмоналиев
2020-жылы декабрда мыйзамсыз байыган деп кармалган Жогорку Соттун мурдагы судьясы Камил Осмоналиев 2021-жылы мартта мамлекетке 114 миллион сом төлөөгө макул болуп, абактан чыккан. Судьяга карата КР Кылмыш-жаза кодексинин 323-беренесинде ("Мыйзамсыз баюу") каралган кылмыш белгилери боюнча айып тагылган.
Айрым ЖМКлардын маалыматы боюнча, "Манас" театрына берилген хан сарай 66 миллион сомго бааланат. Үйдүн аянты болжолу менен 300 чарчы метр.