БИШКЕК, 5-мар. — Sputnik. Министрлер кабинетинин төрагасынын орун басары Эдил Байсалов мектеп жашындагы балдардын санариптик көз карандылыгы боюнча кеңешме өткөрдү. Бул туурасында өкмөттүн маалымат кызматынан кабарлашты.
Министрлер кабинетинин төрагасынын орун басары Эдил Байсалов мектеп жашындагы балдардын санариптик көз карандылыгы боюнча кеңешме өткөрдү
"Биз гаджет жана смартфондордун ашыкча пайдаланылышы өсүп келе жаткан муундун өнүгүүсүнө терс таасирин тийгизип жаткандыгын жакшы түшүнөбүз. Мектеп окуучулары ата-энелерине баш ийбестен, агрессия пайда болуп, айрым учурларда жагымсыз кесепеттерге алып келүүдө. Мамлекет бул багытта так иштерди алып баруусу зарыл", — деген Байсалов.
Ал келечек муунду тарбиялоо программасын иштеп чыгуу керектигин, анда аталган багыттар боюнча мамлекеттик органдардын конкреттүү иш-чаралар планын киргизүү зарылдыгын айткан.
Жыйында билим берүү жана илим министринин орун басары Надира Жусупбекова маселени натыйжалуу чечүү үчүн ата-энелердин катышуусу маанилүү деген пикирин билдирген.
"Мектепте интернетти колдонууда чектөөлөр бар, ата-энелер үчүн эскертмелер иштелип чыккан, анда гаджеттердин баланын өнүгүүсүнө тийгизген таасири жөнөкөй жана түшүнүктүү тилде жазылган. Бирок биз ар бир үй-бүлөгө келип, кооптуу сайттарды жаап, баланын мектептен сырткары эмне кылып жатканын текшере албайбыз. Ата-энелер балдарына көбүрөөк көңүл буруп, смартфон жана гаджеттерди караган убактысын чектеши керек. Ар дайым ата-эненин көзөмөлү керек", — деген министрдин орун басары.
Талкуунун жыйынтыгында мамлекеттик органдардын жетекчилерине, балдар укугу боюнча ыйгарым укуктуу өкүл Жыпариса Рысбековага, Конституциянын 10-беренесине ылайык, өсүп келе жаткан муунду коргоо боюнча ченемдик-укуктук актыларды иштеп чыгуу тапшырмасы, андан сырткары, жогоруда сөз болгон маселелер боюнча кошумча көрсөтмөлөр да берилген.