Эгер мыйзам күчүнө кирсе, ага баш ийбегендерге чара колдонуу маселеси чечиле элек. Себеби Укук бузуулар кодексинде айып пулдардын эң жогорку көлөмү 20 миң сом деп белгиленген. Талкуунун катышуучулары бул сумма аз болуп каларын айтып, 150 миң сомго чейин чыгарууну сунушташты.
Демилгечи депутат Улугбек Ормонов айып пулдун көлөмүн көбөйтүү үчүн биринчи кодекске өзгөртүү киргизүү керектигин айтты.
Эл өкүлү Айбек Маткеримов тажияда жылкы, бодо мал союуну чектеген менен 5-10 кой соё беришет деген пикирин ортого салып, майда жандыктарга да тыюу салууну демилгеледи.
Натыйжада атайын комиссия түзүлүп, мыйзам долбоорун толуктап иштеп чыгуу чечимин кабыл алышты.
Долбоордо сунушталган талаптар:
Мекемелердин жана уюмдардын түзүлгөн күнүн, эмгек сиӊирген адамдарды эскерүү күндөрүн мамлекеттик деӊгээлде майрамдоо министрлер кабинети тарабынан белгиленген тартипке ылайык жүзөгө ашырылат;
Үй-бүлөлүк салтанаттарга (туулган күн, тушоо кесүү, бешик той, сүннөт той) 200дөн ашпаган адам чакырылат;
Үйлөнүү тойлор 300гө чейинки адамга банкет менен бир күндүн ичинде өткөрүлөт;
Никелешүүнү мамлекеттик каттоо салтанаты үчтөн ашык эмес жеӊил автоунааны колдонуу менен өткөрүлөт;
Маркумду акыркы сапарга узатууга катышуучулардын саны чектөөсүз. Бирок бодо мал жана жылкы союлбайт;
Маркумдун элесине арналган иш-чаралар 100дөн 300гө чейин адамды чакыруу менен өткөрүлөт;
Үйлөнүү той, үй-бүлөлүк салтанаттар эс алуу күндөрү саат 8:00дөн 23:00гө чейин, иш күндөрү саат 18:00дөн 22:00гө чейин болушу шарт.
Жогоруда белгиленген талаптар үйдө өтчү иш-чараларга дагы тиешелүү.
Мамлекеттик жана муниципалдык кызматкерлер жана алардын балдары бул мыйзамды бузган учурда кызматтан бошотулат.
Мыйзамдын аткарылышын көзөмөлдөө жана элге түшүндүрүү иштерин жүргүзүү үчүн жергиликтүү бийлик органдары тарабынан комиссия түзүлөт.
Тема боюнча: