БИШКЕК, 27-фев. — Sputnik. Акыркы күндөрү Россияны SWIFT тутумунан чыгарып салуу туурасында сунуштар көп айтылууда. РИА Новости Еврокомиссиянын башчысы Урсула фон дер Ляйен ЕБ өлкөлөрүнүн лидерлерине россиялык банктарды SWIFT системасынан өчүрүүнү сунуштарын айтканын жазды.
Бул тема январь айында эле көтөрүлгөн. Евробиримдик Россияга каршы санкция киргизүүнү пландаган, алардын арасында SWIFT системасынан Россия банктарын чыгарып салуу да айтылган. Бул дүйнөдөгү бардык финансылык мекемелерге жүргүзүлгөн операциялар боюнча, каражаттын жөнөтүлгөн же алынганы боюнча маалымдап туруучу система.
Sputnik Кыргызстан Улуттук банкка кайрылып, аталган система өчүрүлсө, Россияда иштеп жүргөн мигранттарга, дегеле Кыргызстандын экономикасына кандай таасир тиери тууралуу сурады.
Дагы бир жолу эске сала кетели, бул жооп Улуттук банктан январь айынын соңунда алынган.
"Кандайдыр бир кыйчалыш кырдаал жаралып калса, маалыматтарды алуу же жөнөтүү боюнча өлкөнүн бардык банктарында кошумча жолдору (каналдары) бар. Кайсы бир себептерден улам SWIFT иштебей калса, банктарда улут аралык масштабда которулган акчалар боюнча альтернативалуу кабарлашуу мүмкүнчүлүктөрү каралган, алар бар", — деп түшүндүргөн Кыргызстандын Улуттук банкынан.
Транзакциялардын арбынынан кардарлар атайын эсеп ачпай эле которуп келишет. Бул жерде операциянын арзандыгы башкы ролду ойнойт.
Муну менен катар эле Улуттук банктан техникалык жактан алып караганда, Россияда SWIFT өчүрүлсө, ал Кыргызстанга түздөн-түз таасирин тийгизбестигин, себеби өлкөдө аталган система иштей берерин кошумчалашкан.
Мындан мурдараак Россиянын Коопсуздук кеңешинин төрагасынын орун басары Дмитрий Медведев россиялык ЖМКларга курган маегинде бул тема туурасында кеп кылган.
"Бул боюнча (SWIFT системасынын өчүрүлүшү – ред.) өзүбүздүн даярдыгыбыз бар. Эгерде андай нерсе болуп кетсе, финансыны бере турган өзүбүздүн маалыматтарыбыз иштейт. Муну Борбордук банк даярдап койгон. Система тесттен өтүп, текшерилип, иштеп турат. Бир мүнөт да туруп калбай, өлкө ичинде бардык зарыл болгон функциялар аткарылат", — деп түшүндүргөн Медведев.
Ал Россияда SWIFT болбой калган күндө да "эл аралык системанын карталары өлкөнүн аймагында эркин иштеп, которууларды аткара берерин" кошумчалаган.