БИШКЕК, 27-фев. — Sputnik. Россиянын эл аралык резервине санкция киргизебиз деп коркуткан Батыштын мындай аракети бирөөнүн мүлкүн уурдоого жатат. Бул тууралуу Мамдуманын финансы рыногу боюнча комитетинин жетекчиси Анатолий Аксаков билдиргенин РИА Новости жазды.
Буга чейин Еврокомиссиянын башчысы Урсула фон дер Ляйен Евробиримдик АКШ, Улуу Британия жана Канада менен биргеликте Россиянын Борбордук банкынын активдерин тоңдуруп коёрун билдирген. Ал эми америкалык администрациянын өкүлү АКШ менен анын союздаштары Россиянын Борбордук банкынын эл аралык финансылык операцияларда рублдин курсун колдоп турган мүмкүнчүлүгүн чектөөнү пландап жатканын айткан.
“Бул чындыгында кол салууга жана бирөөнүн мүлкүн уурдоого жатат. Биз дүйнөлүк экономиканын ажырагыс бир бөлүгүбүз. Мындай кадам финансылык "артерияны" кесип салганга барабар. Ошондуктан экономикалык "организм" үчүн оор болот”, — деди Аксаков.
Борбордук банктын маалыматына караганда, 18-февралга карата Россиянын эл аралык резервдери 643,2 миллиард долларга жетип, тарыхый рекордду жаңылады. Борбордук банктын валюталык резерви боюнча маалымат жарым жылда бир жолу ачыкталат. 30-июнда активдердин үлүшүнүн долларлык жалпы портфели 16,4 пайызды, евро - 32,3 пайызды, юань - 13,1 пайызды, фунт стерлинг - 6,5 пайызды, башка валюталар – 10 пайызды түзгөн. Алтындын үлүшү 21,7 пайызга жеткен.
Жекшемби күнү Россиянын банкы финансылык туруктуулукту кармап турууга ресурстары жетиштүү экенин жана финансылык сектордогу операциялардын тынымсыз иштөөсүн камсыздай аларын билдирген.