БИШКЕК, 26-фев. — Sputnik. "Альянс" партиясынын мүчөсү Эмил Жамгырчиев Жогорку Кеңештин депутаты болуп катталды. Бул тууралуу БШКнын маалымат кызматы кабарлады.
Ага президенттин Ысык-Көл облусундагы өкүлү болуп дайындалган Алтынбек Сулаймановдун мандаты өткөрүп берилген. БШК жаңы эл өкүлүнө депутаттын күбөлүгү менен төш белгисин тапшырганы айтылды. Ал шайлоодо 4 607 добушка ээ болгон.
Эмил Жамгырчиев ИИМ академиясын "юриспруденция" адистиги боюнча жана Скрябин атындагы Кыргыз улуттук агрардык университетинин экономика факультетин бүтүргөн. 2014-жылдан тарта Экономикалык кылмыштуулукка каршы күрөшүү кызматында иштеп, 2017-2020-жылдары жетекчинин орун басарлыгын аркалаган. Кызматтан кетери менен пара алууга шектелип УКМК тарабынан кармалган. Кийин мамлекеттик бюджетке 20 миллион сом төккөнү кабарланган.