"National Geographic Россия" сайтынын жазганына караганда, бул жаңы изилдөө суу жаныбарлары менен мындан аркы "сүйлөшүүгө" негиз болушу мүмкүн.
Австралиянын улуттук университетинин изилдөөчүлөрү музыка улутту эле эмес, жан-жаныбарларды да тандабастыгын, баарына тең бирдей ырахат тартуулай тургандыгын далилдөө үчүн эксперимент жүргүзгөн. Музыканы жактыргандардын арасына суу жаныбарлары да кирген.
Алар 2021-жылдын декабрь айында атайын илимий изилдөө жүргүзүшүп, дельфиндерди флейтанын жогорку жыштыгы кызыктырарын, пикколо (жыгач үйлөмө аспап), индиялык бансура (бамбуктан жасалган чоор сымал аспап) жана адамдын бийик чыккан үнүнө кайдыгер карабастыгын аныктап чыгышкан.
Эксперимент Порт-Стивенс (Жаңы Түштүк Уэльс штаты) аймагында жүргүзүлгөн. Бул акваторияны жер которуп жүрүүчү 140ка чукул дельфин байырлайт. Аларга чоорчу Салли Уокер аттуу айым концерт берген. Сыбызгыган үн чыгар менен кайдан-жайдан келип, кайыкты айланып жүрүшкөн.
"Бирөө кайык менен жарыша сүзсө, калгандары аны тегеректеп "бийлешкен". Бул жаныбарларды ноталар арасындагы аралыктар менен бийик жыштыктар кызыктырды окшойт", — деп айтылат маалыматта.
Гидрофондун жардамы менен дельфиндердин авазга кандай реакция кылганын жазып алышкан.
Профессор Ким Кунионун айтымында, "абага караганда үн, өзгөчө төмөнкү жыштыктар сууда башкача тарайт. Бирок дельфиндердин жыштыгы өтө жогору болгондуктан алардын "кебин" майда-чүйдөсүнө чейин уга албайбыз. Флейта каалагандай кылып ойной турган авазы эң бийик аспап. Дельфиндердин кыймыл-аракетин карап көрсөк, алар бири-бири менен "сүйлөшүүдө" ушундай ыкманы пайдаланышат.
Окумуштуулар эмки этапта дельфиндер баарынан көп жана тез реакция кылган үндү табууну көздөп жатышат. Бул — Бахтын сонатасы же медитация кылуу үчүн деп кабылданган, жанды жай алдыруучу, тынчтандыруучу аваздар.
Тема боюнча: