БИШКЕК, 16-фев. — Sputnik. Россиялык фигурист Камила Валиеванын Олимпиадада буга чейин көрсөткөн ийгилиги алдын ала жыйынтык болуп эсептелет. Валиева катышкан командалык турнирдеги жыйынтык дагы ушундай абалда экенин Эл аралык олимпиада комитетинин коммуникация боюнча директору Марк Адамска шилтеме берип РИА Новости жазды.
"Валиеванын Олимпиададагы буга чейинки көрсөткүчтөрү азырынча алдын ала жыйынтык катары гана таанылат. Бул спортчу катышкан командалык жыйынтыкка дагы тиешелүү", — деди Адамс.
Эске салсак, өткөн аптада допинг-тест алып текшерген эл аралык агенттик Валиевадан 25-декабрда кызытма боюнча алынган тесттен триметазидин заты чыккандыгын билдирген. Тесттин жыйынтыгын Стокгольмдогу антидопинг лабораториясы 8-февралда берген.
Ага карабай Спорттук арбитраж соту (СAS) россиялык 15 жаштагы фигурист Камила Валиеваны мындан ары Олимпиада-2022 оюндарына катыштыра берүү чечимин кабыл алган.
CAS берген релизде Валиеваны Олимпиада-2022нин жеке турнирине чейин катыштыруу чечими "корголгон персона" (спортчу 16 жашка чыга элек) макамы башкача мамиле жасоону эске алуу менен кабыл алынганы айтылат.
Валиева буга чейин Россиянын курама командасына кирип, ийгилик жаратып Олимпиада чемпиону болгон, бирок сыйлоо аземи али күнчө өтө элек. Кечээ кечинде ал кыска программа боюнча турнирге катышты. Ал эми эркин программасын 17-февралда көрсөтөрү маалымдалган.