БИШКЕК, 10-фев. — Sputnik. Түндүк-түштүк трассасында көпүрөнүн темир тосмосун уурдап кеткен факт боюнча иликтөө иштери жүрүп жатат. Бул туурасында Жалал-Абад облусунун маалымат кызматынан кабарлашты.
18-январь күнү Сузак райондук милициясына жол салып жаткан China Road компаниясынын өкүлү кайрылган.
"Ал Сузак районундагы Курманбек айылынын аймагында Балыкчы — Жалал-Абад жолун куруп жаткан учурда, 10-ноябрдан 12-ноябрда чейинки аралыкта Кырчын жайлоосу аркылуу өткөн көпүрөнүн темир рельстери уурдалганын билдирди", — деп айтылган маалыматта.
Бул уурулуктун кесепетинен компания 200 миң сомдук чыгым тарткан. Аталган факт Кылмыш-жаза кодексинин 205-беренесинин ("Уурулук") негизинде катталып, айылдын жашоочулары сурак берип жатканы кабарланды. Милиция кылмыштын бетин ачуу үчүн иликтөө иштери жүрүп, тиешелүү чаралар көрүлүп жатканы билдирди.