БИШКЕК, 10-фев. — Sputnik. Жогорку Кеңеш оң рулдуу автоунааларды алып келүүгө коюлган чектөөнү алып салуу боюнча мыйзам долбоорун даярдап жатат. Бул тууралуу Жогорку Кеңештин депутаты Чолпон Султанбекова билдирди.
Ушул эле маселени эл өкүлү кечээ да көтөргөн. Экономика жана коммерция министри Данияр Амангелдиев эгер ЖКККББ каршы болбосо, бийлик бул маселени кароого даяр экенин белгилеген. Бирок Жол кыймылы коопсуздугун камсыздоо башкы башкармалыгынын (ЖКККББ) жетекчиси Азамат Исраилов коопсуздук максатында ЖКККББ бул демилгеге каршы экенин айтты.
Султанбекова жарандар эл өкүлдөрүнө дал ушул маселени көтөрүүнү суранып кайрылганын айтып, мыйзам долбоорун даярдоо үчүн айрым кесиптештери менен статистиканы изилдеп жатканын кошумчалаган.
Жогорку Кеңештин депутаты Чолпон Султанбекова
© Фото / пресс-служба Жогорку Кенеша
"Бийлик жол кырсыгы оң рулдуу автоунаалардын кесепетинен болуп жатат деп айтууда. Биз статистиканы карап чыктык. 60 пайызы айдоочулардын жол эрежесин билбегендигинен улам болот экен. Жакшы айдаган адамга автоунаа оң рулдуубу, сол рулдуубу, айырмасы жок", — деген Султанбекова.
Эл өкүлү мыйзам долбоору азырынча талкууланып гана жатканын айтып, бул боюнча министрлер кабинети менен дагы сүйлөшүү жүрөрүн кошумчалады. Анын айтымында, Кыргызстанга азыр автоунаалар Россия, Армения, Грузия жана Абхазиядан алып келинет.
"Көлүк көп алып келингени менен алар абдан кымбат. Бажы төлөмү да арзан эмес. Шаарда каттоого алынбаган автоунаа көп жүрөт. Мындан улам "Коопсуз шаардын" камералары булардын номерин таба албайт, айып пул төлөшпөйт. Көлүктөрдүн техникалык абалы да начар. Анткени ЕАЭБ өлкөлөрүндөгү эски унаалар бизге келип жатат. Мен кээде таксисттер менен сүйлөшүп калам. Алар автоунаалардын абалы "нөл" экенин, бирөөндө да катализатордун жоктугун айтууда. Бул дагы экологияга зыянын тйигизүүдө", — деди Султанбекова.
Депутат кечээки билдирүүсүнөн кийин интернет-колдонуучулардын көбү анын демилгесин колдоорун жазганын белгилеп, бул маселени ЕЭКте көтөрүү керектигин кошумчалаган.
"Биз ЕАЭБге адамдардын жашоосун жакшыртуу үчүн кошулганбыз. Башка мамлекеттерге оң рулдуу автоунаа алып кирсе болот дагы, бизге эмнеге болбойт? Бул маселени саясатташтыргым келбейт, бирок аткаминерлерибиз ЕЭКте көтөрүп чыгышы керек", — деген эл өкүлү.
Султанбекова ЖКККББнын пикирине да жооп берди.
"Бул маселеге бир жактуу карап, дароо кырсык көбөйөт деп ойлогон туура эмес. Оң рулдуу автоунаа кирбей калганда эле жол кырсыгы азайып кеттиби? Болгону жол эрежеси боюнча сапаттуу билим берүүнү жакшыртуу зарыл", — деген ал.
Белгилей кетсек, Кыргызстанда оң рулдуу автоунааларды каттоого 2015-жылы тыюу салынган. Бүгүнкү күндө өлкөдө 200 миңден ашык автоунаа оң рулдуу.