БИШКЕК, 8-фев. — Sputnik. Керээли-кечке отуруп иштөө, аз кыймылдоо ар кандай "кеңсе" ооруларын пайда кылат. Бирок айрым жөнөкөй эле эрежелерди аткарган адамдар ал илдеттерден оолак болорун терапевт Галина Родченкова айтып, эрежелерди тизмектеп бергенин РИА Новости жазды.
Дарыгер белгилегендей, туура эмес тамактануу, отуруп иштөө, стресс, убагында эс албай эмгектенүү ден соолукту билинбей талкалайт.
"Адам убактысынын көбүн отуруп өткөрсө кыр арканын моюнга жакын жери жабыркайт. Мындан тышкары, кол, бел ооруйт. Кыймылдабай отуруп иштөө варикоз, гипертония, геморрой илдеттерине кептейт. Туура эмес тамактануудан кечке отурган адам толуп да кетет", — деген Родченкова.
Медик компьютерди карап иштеген адамдын көрүүсү начарлай турганын эскерткен. Мындай "кеңсе" ооруларынан оолак болом дегендерге терапевт жөнөкөй эрежелерди тизмектеп берди.
"Көзгө бат-баттан көнүгүүлөрдү жасап, тамактанууга көңүл бурган оң. Кийин варикоз, геморрой менен жабыркап калбайын десеңиз жарым саат сайын тыныгууну адатка айлантыңыз. Тыныгуу учурунда гимнастика жасап же сейилдеңиз. Болбосо тепкичтен өйдө-ылдый түшүңүз", — деген терапевт.
Родченкова эгер жогоруда аталган оорулардын биринин эле белгиси байкалса, анда тезинен медиктерге кайрылууну сунуштаган.