БИШКЕК, 28-янв. — Sputnik. Мамлекеттик катчы Сүйүнбек Касмамбетов бүгүн, 28-январда, өлкө башчы Садыр Жапаровдун атынан спортчу Максим Гордеевди Пекинде өтө турган Кышкы Олимпиада оюндарына катышуусу менен куттуктап, жылуу саламын жолдоду. Бул тууралуу президенттин маалымат кызматы кабарлады.
Ал белгилегендей, президент жана жалпы Кыргызстан эли өз олимпиада спортчусун сүрөп, Пекинде өтүүчү кышкы оюндарда чеберчилигин көрсөтөт деп ишенет.
Мамлекеттик катчы спортчунун машыктыруучусуна эмгеги үчүн ыраазычылык билдирип, өлкөнүн татыктуу спортчуларын тарбиялоодогу аракетин белгилеген.
Улуттук олимпиада комитетинин президенти Садыр Мамытов спортчу эч нерсеге муктаж болбой, бул оюндарга толук даярдык көрүүсү үчүн бардык шарттар түзүлгөнүн белгилеген. УОК тоо лыжачысы Максим Гордеев өзүнүн эң мыкты спорттук жыйынтыгын көрсөтөт деп үмүттөнүп жатканын айткан.
"Кыргызстан тоолуу өлкө жана бизде кышкы спортту өнүктүрүү үчүн бай потенциал бар. Мен жакынкы аралыкта Кышкы спорт борборун ачуу мүмкүнчүлүгүн карап, стратегияны иштеп чыгууну жана бул үчүн инвесторлорду издеп, ошондой эле туристтерди тартуу үчүн инфраструктураны өнүктүрүүгө басым жасоону сунуштайм", — деген УОК башчысы.
Жолугушуунун соңунда Касмамбетов Гордеевге Кыргыз Республикасынын туусун тапшырып, ага ийгилик каалады.