БИШКЕК, 27-янв. — Sputnik. Баткенде кыргыз-тажик чек арасында атышуудан улам коопсуз жайга көчүрүлгөн тургундардын видеосу тарады.
Кадрдан мектептин спорттук залына төшөк салып жайгашкан аялдарды жана балдарды көрүүгө болот.
Баткен милициясы кооптуу аймактардан элди алып чыгууда жана өздүк курам күчөтүлгөн тартипте иш алып барууда.
Президенттин Баткен облусундагы өкүлчүлүгүнүн маалыматы боюнча, Баткен районунун Орто-Боз, Жака-Өрүк,Үч-Дөбө, Ак-Татыр, Ак-Сай, Таш-Тумшук, Самаркандек айылдарынын тургундары жергиликтүү бийлик тарабынан Баткен шаарына жана Рават айылы тарапка эвакуацияланууда. Лейлек районунун Кулунду айыл аймагындагы Максат, Кулунду, Сада айылдарында жашагандар коопсуз жайга чыгарылууда. Баткен шаарына эвакуацияланган жарандар тамак-аш менен камсыздалды. Ак-Сай айыл өкмөтүнүн айылдарынан келген 60 үй-бүлө Баткен шаарынын №3 А. Имаров орто мектебине жайгаштырылды.
Эске салсак, УКМКнын Чек ара кызматы 27-январь күнү саат 17:30дан 18:00гө чейинки убакыт аралыгында Тажикстандын чек арачылары Баткен районуна караштуу Төрт-Көчө аймагындагы Баткен — Исфана жолунун бир бөлүгүн бир тараптуу жаап салганын билдирген. Эки өлкөнүн чек ара өкүлдөрүнүн сүйлөшүүсү менен саат 19:30да жол ачылган. Бирок 19:35те абал кайра курчуп, Тажикстандын аскерлери ок атып, миномёт жана гранатомёт колдонгон.
Кыргызстандын УКМК төрагасынын биринчи орун басары, Чек ара кызматынын жетекчиси Уларбек Шаршеев менен Тажикстандын УКМКсынын чек ара аскерлеринин командачысы Раджабали Рахмонов телефон аркылуу байланышты кармоодо. Рахмонов ок атууну токтотууну суранса, Шаршеев атышууну тажик аскерлери улантып жатканын айтууда.
Кыргыз-тажик чек арасындагы атышуудан төрт кыргызстандык аскер жаракат алган. Тажикстандан ондон ашуун аскер кызматкери жабыркаганы айтылууда.