Акбар Жороев пластикалык микрохирургия, колдун микрохирургиясы жана реконструктивдүү хирургия менен алектенет. Ал өзүнүн биринчи операциясын жети жыл мурда жасаган. Соңку ирет Жороев 13 саат тыныгуусуз операция жасаган. Ал ар бир жабыркаган кан тамырды микроскоптун жардамы менен калыбына келтирет. Хирург бир жылда миңге чукул операция жасайт.
"Операция жасап, баарын калыбына келтирип койгондон кийин абдан канааттанасың. Бул сезимдерди сөз менен жеткирүү мүмкүн эмес. 10 саат болсо да, кээде 15 саатка чейин, жада калса бир сутка бою микроскоп алдында операция жасайбыз. Бүткөндөн кийин чарчаганыңды, баарын унутасың. Үйүңө ыраазы болгон бойдон кетесиң", — деди дарыгер.
Улуттук госпиталдын базасындагы бөлүм күнү-түнү иштейт. Ал "реконструктивдүү хирургия бөлүмү жана колдун хирургиясы" деп аталат. Бул Кыргызстандагы жалгыз мекеме. Ал жакка оор жаракат алгандар,дене мүчөлөрү жулунуп кеткендер алып келинет. Хирург жеке клиникада дагы эмгектенүүгө жетишет. Дарыгерди чет өлкөнгө чакыргандар арбын. Бирок ал мекенин таштап кеткиси келбей турганын билдирди.
"Жыл сайын, ай сайын чет өлкөдө иштөөгө чакырышат. Бирок мен өз өлкөмдүн патриотумун. Мага бул жер эле жагат. Башка жакка барып иштейин деген ниетим жок. Мен ушул жерде, Кыргызстанда иштейм", — деди ал.
Sputnik агенттиги мындан бир нече жыл мурда чаалыкпаган хирург Мамбет Мамакеев тууралуу видео тарткан. Дарыгер 70 жылдан бери операция жасап келет.
Тема боюнча: