БИШКЕК, 5-янв. — Sputnik. Казакстандагы митингден кийинки башаламандыктар токтой элек. Социалдык тармактарда окуя болгон жерлерде тартылган түрдүү видеолор тарап жатат.
Бул кадрдан жүрүп бара жаткан БТРди жана аны жандай, торой чуркап, таш менен урган элди көрүүгө болот. Видеонун качан ким тарабынан кайсы жерден тартылганы азырынча белгисиз.
Дагы бир видеого митингге чыккан жарандар полициянын автоунааларын талкалап, өрттөп жатканы түшүп калган. Ошондой эле жаракат алган бир адамды замбил менен көтөрүп баратышканын көрүүгө болот.
Азырынча башаламандык маалында канча адам жаракат алганы туурасында маалымат жок.
Алматыда күч түзүмдөрү көздөн жаш агызуучу газ, кулак тундуруучу гранаталарды колдонуп, митингчилерди борбордук аянттан сүрүп чыккан. Митингчилер андан ары барып башка көчөлөрдө жүрүш уюштурган, бирок полиция четинен кармап жатат.
Эл менен күч түзүмдөрүнүн кагылышуусун алдын алуу үчүн президент Касым-Жомарт Токаев чагымчылдыкка алдырбоого, мамлекеттик мекемелерге чабуул жасабоого чакырган. Ошондой эле бийлик кулабай турганын билдирген.