БИШКЕК, 28-дек. — Sputnik. Сербиянын электрондук ЖМКларды көзөмөлдөгөн кеңешинин (REM) төрайымы Оливер Зекич Sputnik агенттигине курган маегинде RT DE телеканалынын лицензиясы мыйзамдын чегинде берилгенин билдирди.
"Сербиянын электрондук ЖМКлар боюнча Көзөмөл органынын (REM) Россиянын RT DE каналына лицензия беришинде эч кандай талаштуу маселе жок. Германиянын койгон доосу жумшак айтканда таң калтырып жатат. Бул маселенин айланасында чыккан ызы-чууда саясий гана боёк болушу мүмкүн", — деди ал.
Зекич тийиштүү талаптарга жооп берген телеканалдын иш алып баруусуна берилчү лицензия эң жөнөкөй процесс экенин билдирген. Ал ошондой эле RT DE уруксат кагазын алуу үчүн бардык коюлган шарт-талапты аткарганын белгилеген. Ал эми Германиянын "телеканал лицензияны мыйзамсыз алган" деп койгон кинесине күлгөндөн башка эч нерсе дей албай турганын кошумчалады.
"Мен күлгөндөн башка эч нерсе дей албайм. Биз бир дагы мыйзамды аттап кеткен жокпуз", — деди эксперт.
Зекич ар бир процедура мыйзамдарга жана Европанын транс чек аралык Конвенциясына таянуу менен аткарылганын белгилеген.
"Немецтер каерден көйгөй таап жатканын билбейм. Себеби бардык коюлган талаптар эске алынган. Сербиядан лицензия алгандар өзүнүн контентин Сербиянын жана Европа өлкөлөрүнүн аймагында көрсөтө алат", — деди ал.
Зекичтин айтымында, "ТВ Новости", RT auf Deutsch юридикалык жак 3-декабрь күнү медиалык кызматтарды кабель, спутник жана IPTV тармактары аркылуу көрсөтүүгө уруксат сурап электрондук ЖМКлар боюнча Көзөмөл органына кайрылган. Мыйзамдарга жана мыйзамдык актыларга ылайык, бардык документтер REM Кеңешине берилген. Коюлган шарт-талаптар аткарылгандыктан юридикалык жакка уруксат берилген.
22-декабрь күнү медианы көзөмөлдөгөн германиялык MABB Eutelsat 9В деген европалык спутниктик операторун өзүнүн платформасынан RT DE каналын алып салууга мажбур кылган. Германия 23-декабрь күнү транс чек аралык телевидение жөнүндөгү Европа конвенциясын ратификациялаганы кабарланган. Бирок немец тилдүү RT DE телеканалы сербиялык лицензиясы менен Германияда көрсөтүүлөрүн берер-бербеси өлкөнүн көзөмөл органы тарабынан текшерилип жатат.
Россиянын ТИМинин расмий өкүлү Мария Захарова RT DE каналынын спутниктен алып салынышына комментарий берип жатып, Германия Россияны жооп катары чара көрүүгө түртүп жатканын билдирген.
Ал эми Россиянын президентинин маалымат катчысы Дмитрий Песков RT DE каналынын кызыкчылыктарын коргоого чакырган.