БИШКЕК, 23-дек. — Sputnik. Президент Садыр Жапаровдун уулу Рустам Жапаров Sputnik Кыргызстан маалымат агенттигинин кабарчысы Эламан Карымшаков тууралуу пикирин айтты.
Ал журналисттин Instagram баракчасын скриндеп, өзүнүн сторис бөлүмүнө жайгаштырган.
© скриншот с Instagram
"Бул бала азамат. Тигилердин артынан түшүп алат, байкуштар дайыма качып жүрүшөт", — деген Жапаров.
Эламан Карымшаков — парламенттик кабарчы. Ал Жогорку Кеңештеги окуялар тууралуу маалымат берип, депутаттар менен аткаминерлерден интервью алып, алардын арасында блиц-сурамжылоолорду жүргүзүп, тартуучу топ менен актуалдуу коомдук-саясий темалар боюнча видеорепортаждарды даярдайт.
Карымшаковдун коомдук резонанс жаратып, анын арты менен чиновниктерди кызматтан алууга түрткү берген материалдары бар. Атап айтканда, мурдагы айыл чарба министри Нурбек Мурашев, билим берүү жана илим министри Гүлмира Кудайбердиева, "Унаа" мамлекеттик мекемесинин жетекчиси Алымжан Козубаев, транспорт министри Жамшитбек Калилов, мамлекеттик каттоо кызматынын башчысы Тилек Батырканов кызматтан алынып, ошондой эле мамлекеттик каттоо кызматынын жетекчиси Акын Мамбеталиевге алгач катуу сөгүш жарыяланып, андан кийин жумуштан кетирилген.