БИШКЕК, 21-дек. — Sputnik. Кыргыз адабиятына негиз салгандардын бири, мамлекеттик чыгаан ишмер Касым Тыныстановдун "Касым ырлар жыйнагы" китеби алгачкы жолу түрк тилине которулду. Басылып чыккан китептин бет ачары бүгүн, 21-декабрда, болмокчу. Бул тууралуу Улуттук илимдер академиясынан билдиришти.
"Касым ырларынын жыйнагы" (Ḳasım Irlarının Cıynaġı) китебинин биринчи жолу түркчө котормосу жасалып, транскрипциясы менен тилдик изилдөө жүргүзүлдү. Мындан тышкары, 1925-жылдан бери биринчи жолу араб арибиндеги түп нускасы жарыяланды", — деп айтылат билдирүүдө.
312 беттен турган китепти Түрк эл аралык академиясы (International Turkic Academy) Нур-Султан шаарында басып чыгарган.
Касым Тыныстановдун "Касым ырлар жыйнагы" китебине "Таң", "Бүгүнкү күн", "Кыз карындаштарыма", "Жаз", "Булбулга", "Айга", "Эрксиз ажырашканга", "Манас күмбөзү", "Жаз", "Жаңыл Мырза" сыяктуу бир катар ырлары камтылган.