БИШКЕК, 16-дек. — Sputnik. Кыргызстан Афганистанга мунай зат экспорттогон жок. Мындай билдирүүнү УКМК таратты.
Комитеттен билдиришкендей, буга чейин бир катар ЖМКларда "Афганистанга Кыргызстандан мунай зат жөнөтүлүп жатат" деген маалыматтар чыккан.
"Министрлер кабинетинин 2021-жылдын 16-декабрындагы токтомуна ылайык, мамлекеттик чек аранын кыргыз-тажик тилкесиндеги көзөмөл-өткөрүү пунктулары аркылуу жарандарды, автоунааларды жана жүктөрдү өткөрүү убактылуу токтотулган. Дагы бир токтомго ылайык, мунай жана мунай продуктуларын ЕАЭБдин аймагынан чыгарууга болбойт", — деп айтылат УКМКнын билдирүүсүндө.
Андыктан комитет мунай сыртка ташылып жатат деген маалыматты төгүндөй турганын кошумчалады.