Алтын казынага көлөмдүү дастан, эпосторду жана музыкалык чыгармаларды кабыл алдык. Бул тууралуу Жээнгүл Исакова Sputnik Кыргызстан радиосунун эфиринде маек куруп жатып билдирди.
Анын айтымында, алтын казынага мульти-инструменталист Нурланбек Нышанов жетектеген "Устат-шакирт", "Жетиген" ансамблдери аткарган 100гө жакын күү түшкөн.
"1960-жылы Ашыралы Айталиевдин айтуусундагы "Карагул ботом" дастаны жазылып калган эле. Аны радиодон бергенде эл ыйлап укчу. Азыр аталган дастандын Мээрим Карыпованын аткаруусундагы жаңы версиясы түштү. Бул чоң жаңылык болду. Себеби эркек киши айта турган чыгарманы Карыпова ички сезими, үнүнүн күчтүүлүгү менен жакшы аткарган экен. Манасчы, дастанчы Самат Көчөрбаевдин аткаруусундагы "Кожожаш", Улукбек Токтобек уулунун аткаруусундагы "Жаныш-Байыш" дастанын кабыл алдык. Андан тышкары, улуу жазуучу, маркум Чыңгыз Айтматовго арналган Элмирбек Иманалиевдин кошогун, Төлөгөн Касымбеков, Нурак Абдрахманов өңдүү залкарларга арналып жазылган чыгармаларды казынага киргизүүнү чечтик. Көркөм кеңештин талабы боюнча КРдин эл артистери Анарбек Ибраев, Сардарбек Жумалиев, композиторлор Турдубек Чокиев, Адылжан Абдуллаев, хормейстер Карагул Тиленчиев, акын Кыялбек Урманбетов жана аранжировщик Рафаэль Сарлыков алтын казынага киргизилчү музыкалык чыгармаларды өзүнүн адистиги боюнча баалап, тандашат. Тематикасы, сөзүнүн мааниси, музыкасынын оригиналдуулугу жана сапаты жагынан эң жогорку деңгээлде болгон композициялар кабыл алынат. Учурдагы ырчы-чоорчулардын ичинен Мыктыбек Нурланбеков, Адилет Азимов, Акмаанай Эшпаева, Токтобек Асаналиев, Аскат Мусабеков, Мирбек Атабеков жана Улан Качкыналиевдин ырларын казынага киргиздик. Кошумчалай кетчү жагдай, көркөм кеңештин мүчөлөрү эгер чыгарма талапка жооп бербесе, кайра оңдоого жөнөтөт. Андыктан жаш авторлор менин чыгармамды кабыл албай койду, жаратпай салышты дебей айтылган кемчиликтерди оңдоп, кайрадан бизге алып келсе болот", — деди Исакова.
Адис Совет мезгилинде алтын казынадагы уктуруулар 10-15 жылда бир Москва жөнөткөн жаңы пленкаларга көчүрүлүп турганын эскерип, ошондуктан аудиоберүүлөр ушул убакка чейин жарактан чыгып калбай сакталып калганын кошумчалады.
Подкасттын толук вариантын төмөнкү видеодон көрүңүз: