БИШКЕК, 7-сен. — Sputnik. Эндокринолог-диетолог Татьяна Бочарова адам бир күндө канча кант жесе ашыкча болбой тургандыгын айтып берди. Бул тууралуу РИА Новости жазды.
"25-50 грамм — чоң киши үчүн норма деп эсептелет. Бул Дүйнөлүк саламаттык сактоо уюму бекитип берген көлөм. Мунун ичинде кумшекер эле эмес ар кыл таттуу тамактар, канты бар экени билине бербеген азыктар бар", — деген дарыгер.
Анын айтымында, кант соуста, кетчупта, консерваланган жашылчада, майы азайтылган сүт азыктарында жана даярдалып сатылган эртең мененки тамактын курамында бар.
Дарыгер адам таттууну көп жегенде ал азыктардын калорийи рациондун жалпы калорийинин ичинен 10 пайыздан ашпашы керектигин билдирди. Андан көбөйсө экинчи типтеги кант диабети жана толуп кетүү тобокелдиги жаралат.
Таттуу туурасында айтканда балдар өзгөчө маанилүү экендигин эскерте кетсек. 10 жашка чейинки балдарга күнүнө үч кашык кумшекерден көп берүүгө болбойт. Ал эми 3 жашка чейинки бөбөктөрдүн организмин түзүмүндө канты бар жашылча-жемиштин жардамы менен толтурса болот.