БИШКЕК, 23-авг. — Sputnik. Быйылкы жылдын июль айынын ортосунан тарта Кыргызстанга кирүү үчүн виза алууга арыз жазган Пакистан жарандарынын саны өсүп, 7,5 миң адамга виза берилген. Бул тууралуу ТИМдин маалымат кызматынан кабарлады.
Кыргызстандын Тышкы иштер министрлиги акыркы учурда өлкөдө Пакистан жарандарынын саны кескин көбөйүп кеткени боюнча түшүндүрмө берди.
"Пакистан жарандары Кыргызстанга келген максатын туризм деп айткандыктан улам 30 күнгө бир жолку виза берилет", — деп билдирген ТИМ.
Тышкы мамилелер боюнча ведомстводон "Электрондук виза" порталына келип түшкөн арыздар КРдин Улуттук коопсуздук боюнча мамлекеттик комитетинен да өтөрү айтылган.
Пакистандын жарандары үчүн визалык тартипти жөнөкөйлөтүү боюнча маалымат берген ТИМ ал нерсе БАЭде, Кувейтте, Катарда, Бруней-Даруссаламда, Оман Султанатында, Бахрейнде же Сауд Аравиясында туруктуу жашоого уруксаты барларга (резидент-картанын ээлерине) карала тургандыгын айтты. Анын алкагында Пакистан жарандарына бүгүнкү күндө 220 виза берилген.
Кыргызстанда Пакистан жарандарынын көбөйүп кеткендиги боюнча социалдык тармактагы маалыматтарга түшүндүрмө берүү үчүн бүгүн ТИМге Пакистандын Кыргызстандагы элчисинин орун басары — консул Тарик Али (Tariq Ali) чакырылган.
"Жолугушууда дипломат Тарик Али Кыргызстанда жүргөн пакистандык жарандардын көп бөлүгү иштеш үчүн андан ары Бириккен Араб Эмирлигине жана Сауд Падышалыгына учуп кетерин айтты. Азыркы кырдаал Пакистан менен жогорудагы эки өлкөнү байланыштырган түз каттам болбогондуктан жаралган. Мындай аба багыт КРден сырткары Өзбекстан аркылуу да бар", — деп кабарлашты ТИМден.
Элчинин орун басары Пакистанда коронавирус инфекциясынын азайып бара жатышы менен Бириккен Араб Эмирлиги аталган өлкөнүн жарандары үчүн чек араны ачып, эмираттык узак мөөнөттүү визаларды бере баштаганын кабарлады. Анын айтымында, жакынкы арада Сауд Аравиясынын падышалыгы да чек араны ачууну пландап жатат. Дипломат эгерде бул иштер эртерээк жасалса, Кыргызстанда жүргөн пакистандыктардын саны азаярын түшүндүргөн.
Эске салсак, Кыргызстанга келген пакистандыктардын көбү билим алуу үчүн келгендер, тагыраагы, студенттер.