БИШКЕК, 28-июл. — Sputnik. Коронавирус боюнча ПЦР-анализин тапшыргандар анын жыйынтыгын онлайн форматында электрондук саламаттыкты сактоо булагы аркылуу ала алышат. Бул тууралуу Саламаттык сактоо жана социалдык өнүктүрүү министрлигинен кабарлады.
"ПЦР" кошумча баракчасына колдонуучу өзүнүн маалыматтарын (өзүнүн ПИН-кодун жана паспорттук маалыматтарын) киргизүү менен акыркы анализинин натыйжаларын көрө алат. Тесттин жыйынтыгын билүү үчүн сиз чалып же бир жакка баруунун кажети жок", — деп айтылган маалыматта.
Аталган министрликтен бул жарандарга ыңгайлуулук жаратуу максаты көздөлгөндүгүн айтты. Андан сырткары, медициналык маалыматтарды оңой алууда санариптик чечимдерди ишке ашыруудагы иштердин бири экендигин билдирди.
"Зарылчылыкка жараша ПЦР-анализдин натыйжаларын алуу кызматы жакшыртылат. Кызмат тест режиминде ишке киргизилди", — деп айтылган маалыматта.
Учурда Кыргызстанда коронавирус менен ооругандар салыштырмалуу азайып бара жатканы айтылды. Анткен менен медиктер, адистер элди COVID-19га каршы вакцина алуу зарылдыгын эскертүүдө. Мындай кайрылууну бүгүн президент Садыр Жапаров да жасаган.