БИШКЕК, 28-июл. — Sputnik. Ош облусунда 15 жашар кызды куткарабыз деп Ак-Буура дарыясына чөгүп кеткен эже-сиңдилердин бири кыздын 38 жаштагы апасы, экинчиси 36 жаштагы таежеси болгон. Бул маалыматты Sputnik агенттигинин жергиликтүү кабарчысына маркумдардын жакындары тастыктады.
27-июль күнү ӨКМден Ош — Араван каналына агып кеткен өспүрүм кызды куткарабыз деп түшкөн эки аялдын каза болгонун билдирген.
Жакындарынын айтымында, каза болгон эже-сиңди Ош шаарындагы Южный кичи районунда жашашчу. Кечээ алар Төлөйкөн айылындагы Ак-Буура дарыясынын жээгине эс алууга барган. Маркумдардын сөөгү кечээ күнү 17:00 чамасында жерге берилди.