БИШКЕК, 29-июн. — Sputnik. Жогорку Кеңештин депутаттар тобу министрлер кабинетинин төрагасы Улукбек Мариповго электр кубаты менен жылуулукка жаңы тарифтерди киргизүүнү токтото турууну сунуштап кат жөнөттү. Бул туурасында эл өкүлү Дастан Бекешев билдирди.
Депутат социалдык тармакка каттын көчүрүлгөн версиясын жарыялады. Анда депутаттар өлкөнүн электр энергия системасынын абалын көрүп тургандыгын айтып, бирок тарифтерди көтөрүү социалдык жарылууга жана ири компаниялардын жабылышына алып келет деп эскертишкен.
Андан сырткары, бийликтин бул кадамы инфляциянын өсүшү, жакырчылыктын көбөйүшү, инвестициянын сыртка чыгып кетиши жана өлкөдөгү коронавирус боюнча абалдын начарлашы сыяктуу терс көрүнүштөр менен катарлаш туруп калып жатат дешкен.
Депутаттар министрлер кабинетине бул учурларды эске салып, тарифтерди көтөрүүнү жок дегенде үч айга жылдырып турууну сунуш кылган. Андан сырткары, коомдук жалпы талкуу кылып, майнинг-фермалардын статусун карап көрүүнү да кошумчалашкан.
Катка депутатар: Дастан Бекешев, Улан Примов, Айбек Алтынбеков, Мурадыл Мадеминов, Бакыт Жетигенов, Анвар Артыков, Мухтар Айнакулов, Гүлкан Молдобекова, Асел Кодуранова жана Чынара Урумкалиева кол койгон.
Министрлер кабинетинин "Кыргыз Республикасынын 2021-2025-жылдарга карата электр энергиясына орто мөөнөттүү тарифтик саясатын бекитүү жөнүндө" токтомунун долбоору өзүнүн сайтына коюлган.
Калк үчүн төмөнкү тарифтер сунушталууда:
Эске салсак, учурда элдин бардык категориясы бир киловатт-саат электр кубаты үчүн 77 тыйын төлөйт, лимиттен ( 700 кВт-саат) ашып кетсе, баа 2,16 сом болуп кетет. Ал эми катаал шартта, тоолуу аймактагылар үчүн 1 000 киловатт-саат каралган.