БИШКЕК, 14-июн. — Sputnik. COVID-19 илдети менен ооругандардын саны өсүп жаткандыгына байланыштуу тийиштүү мамлекеттик жана жергиликтүү бийлик органдарынын ишин күчөтүү зарыл. Бул тууралуу министрлер кабинетинин төрагасы Улукбек Марипов билдирди.
Өкмөттөн билдиришкендей, бүгүн Марипов өлкөдөгү эпидемиологиялык абал боюнча кеңешме өткөргөн.
Өкмөттөн билдиришкендей, бүгүн Марипов өлкөдөгү эпидемиологиялык абал боюнча кеңешме өткөргөн
© Пресс-служба правительства / Алишер Алиев
"Түзүлүп жаткан кырдаал олуттуу кооптонууларды жаратып жатат. Биз өткөн жылдагыдай каатчылыкка жол бербешибиз керек. Бишкек, Ош шаарларында жана Чүй облусунда эпидемиологиялык абалды кармап туруу жана турукташтыруу боюнча ишти күчтөндүрүү зарыл. Саламаттык сактоо жана социалдык өнүктүрүү министрлиги калкка тийиштүү медициналык-санитардык көмөк көрсөтүү, коронавирус инфекциясына чалдыккан бейтаптарды дарылоо үчүн стационардык мекемелердеги негизги жана резервдик орундардын, ошондой эле дары-дармектердин жетиштүү өлчөмүн камсыздоо маселесин өзгөчө көзөмөлдө кармоосу тийиш", — деди Марипов.
Ал ошондой эле коронавирус инфекциясына каршы вакциналарды жеткирүү жана эмдөө темпин тездетүү боюнча иш алып баруу керектигин айткан.
Өкмөт башчы Кыргызстанга жакын арада Sinopharm вакцинасынын 150 миң дозасы жана "Спутник V" вакцинасынын 80 миң дозасы алып келинерин эске салган.
Эскерте кетсек, бүгүнкү статистикага ылайык, өлкө аймагында 459 адам вирус жуктуруп, 9 киши көз жумганы аныкталды.