БИШКЕК, 16-май — Sputnik. Мамлекет башчы Садыр Жапаров Кыргызстандагы жалпы энелерди бүгүнкү майрамы менен куттуктады.
Өз куттуктоосунда президент эненин өзгөчө ордуна токтолгон.
"Жашообузда эненин өзгөчө ролу бар. Эне — дүйнөдө теңдеши жок асылзат. Эне — өмүрдүн башаты. Эне — ар бир үйдүн, жалпы мекенибиздин куту. Элибиз байыртадан энени ыйык көргөн, Умай эне атаган, жерди — Жер Эне, өз тилин — эне тил деген. Ошондуктан энени урматтоо жана сыйлоо, анын турмуштагы алмаштырылгыс ордун таануу каада-салтыбызга терең тамырлаган. Кыргызстанда бекем, чоң жана ынтымактуу үй-бүлөлөр ар дайым коомдун маанилүү фактору болуп келген. Чыныгы энелик мээримдин чеги жок. Биздин күндөрдө жетим балдарды өз баласындай асырап, мээрмандуулуктун жана нагыз адамгерчиликтин үлгүсүн көрсөтүп, аларга сүйүүсүн, жан дүйнөсүн арнаган энелердин ар бири жалпы коомубуздун терең урмат-сыйына татыктуу", — деп жазылат Жапаровдун куттуктоосунда.
Мамлекет башчы чет өлкөдө эмгектенип жүргөн мекендештердин балдарын камкордукка бөлөп, тарбиялап жаткан апалар менен чоң энелерге да ыраазычылыгын билдирген.
"Сиздер наристелердин бактылуу балалыктын кучагында жайдары жашоосу жана алардын коомубуздун эртеңкисин, мамлекетибиздин келечегин аныктай турган татыктуу жарандардан болуп жетилиши үчүн эбегейсиз зор салым кошуп жатасыздар. Бүгүнкү күндө үй-бүлө институтун чыңдоо, эне-баланы коргоо, энелердин укуктары менен кызыкчылыктарын камсыз кылуу, көп жана жаш балалуу үй-бүлөлөрдү ар тараптан колдоо — мамлекетибиздин социалдык саясатынын эң маанилүү жана артыкчылыктуу багыттарынын бири. Эне жана баланы камкордукка алуу, колдоо жана коргоо багытында улуттук программаны тез арада ишке киргизүүнү тапшырдым", — деп айтылат куттуктоодо.
Садыр Жапаров энелерге бекем ден соолук, узун өмүр, бакубат жашоо каалап өткөн.