БИШКЕК, 9-мар. — Sputnik. Улуттук онкология жана гематология борборундагы залалдуу шишикке кабылган бейтаптарды нур терапиясы менен дарылай турчу линиялык тездеткичтерди монтаждоо иши башталды. Бул тууралуу аталган оорукананын директорунун милдетин аткаруучу Бактыгүл Султангазиева билдирди.
Заманбап аппараттар 3,8 миллион долларга 2019-жылы сатып алынганы менен 2021-жылдын февраль айынын аягына чейин таңгагынан чыгарылбай турган.
Султангазиеванын айтымында, жабдууларды монтаждоо иштери 1-мартта башталган.
"Россия менен Түркиядан адистер келип, жабдууну монтаждоо иштери жүрүүдө. Бригада бир жарым айга чукул иштейт, андан кийин адистер окутулат. Бардык жумуш аяктаган соң линиялык тездеткичтер залалдуу шишикке кабылган бейтаптарды нур терапиясы менен дарылайт", — деди ал.
Оорукана буга чейин өндүрүүчү завод койгон талаптар боюнча радиациялык коопсуздукту сактоо менен атайын бункерлер дайындалганын, негизги жабдууну муздатып туруучу система дагы даяр экенин айткан. Болгону тынымсыз энергия берип туруучу жабдуулар орнотулушу керек эле.