Манас айтуу иш-чарасы 12-ноябрь күнү эртең мененки саат 9:00дө башталды. Ак элечек кийген аялдар, тебетей, калпакчан эркектер, айтор, салттуу кийим кийген жоон топ "Манас" деп ураан чакырып, залкар манасчыны "Ала-Тоо" аянтына коштоп келишти.
Манас айтардын алдында Дөөлөт Сыдыковго олимпиада чемпиону Каныбек Осмоналиев ак батасын берди.
"Кыргыз тарыхын бүткүл дүйнөгө жарыялап жүрө бер. Өмүр бою кыргыз элине кызмат кылып, Алла колдоп, ден соолукта бол!", — деп алкады Осмоналиев.
Ошентип Дөөлөт Сыдыков "Манас" эпосун эртең мененки саат 9:42де айтып баштады. Борбордук "Ала-Тоо" аянтында Манастын эстелигинин жанына бийиктиги беш метр айнектен жасалган боз үй (атайын жай) курулган. Манасчы Сыдыков ошол үйдүн ичинде отуруп айтты. Ал эми аянтка келген эл аны атайын коюлган монитордон көрүп жатышты.
Эпосту тыным албай, узак убакыт айткан мындай окуя Кыргызстандын тарыхында алгачкы ирет болуп жатат.
Бул иш-чаранын максаты — элди ынтымакка, биримдикке чакыруу жана узак убакытка тынбай манас айтууну Гиннестин рекорддор китебине каттатуу.
Филологдордун айтымында, Дөөлөт Сыдыков Манастын бабаларынан тартып, кыргыздардын Алтайдан Ала-Тоого көчө турган мезгилине чейин айткан.