БИШКЕК, 11-авг. — Sputnik. Дүйнө жүзүндө коронавирус жуктуруп алгандардын саны бүгүн эртең менен 20 миллиондон ашты. Бул тууралуу Жон Хопкинс атындагы изилдөө институтунун расмий сайтында жарыяланды.
Бишкек убактысы боюнча саат 9.30га карата дүйнө жүзүндө вируска кабылгандардын саны 20 014 574 киши болду. Мунун ичинен 734 755 бейтап ооруну жеңе алган эмес.
COVID-19га кабылгандардын саны боюнча мурдагыдай эле АКШ алдыда келе жатат. Мында 5 089 416 киши ооруп, 160 миңден ашыгы каза болду.
COVID: Ошто медициналык таштандылар үчүн контейнерлер орнотулду
Андан кийинки орундарда Бразилия (3 057 470) жана Индия (2 215 074) турат.
Таблицадагы маалыматка караганда, Борбор Азия өлкөлөрүндө абал дагы деле оор бойдон калып, эки апта мурда кайсы позицияда болсо ошол жерде кармалып турушат. Мисалы, 188 мамлекет жана аймакты камтыган тизмеде Казакстан 26-орунда. Коңшу өлкөдө ооругандардын саны 100 миңге чукулдап калды. Вирустун мекени болуп эсептелген Кытай бүгүн 30-сапта, мында 88 906 киши оору жуктурган.
Кыргызстан 53-орунда, өлкөдө 40 085 адам вируска чалдыкты. Бизден алты сап ылдый Өзбекстан жайгашкан. Коңшу өлкөдө коронавирустан болгондордун саны 31 304кө жетти. Ал эми Тажикстан 90унчу болуп турат. Расмий маалыматтар боюнча, коңшу мамлекетте 7 827 киши COVID-19га кабылган.
ДССУ кайталап киргизилген карантиндик чектөөлөрдү сынга алды
Баса, эпидемиологиялык абалдын жакшыра элегин сандар дагы айтып турат. Тагыраагы, акыркы бир айда ар бир төрт күн ичинде бир миллион адам вирус жуктуруп жатат.
Мисалы, 26-июль күнү ооругандар жалпысынан 16 миллион болсо, 30-июль күнү 17 миллиондон ашкан. 3-август күнү 18 миллион, 7-август күнү 19 миллион киши болгон.