БИШКЕК, 3-июн. — Sputnik. COVID-19 жуктуруп алып өткөн суткада каза болгон үч киши дагы башка кандай илдеттер менен жабыркаганын брифинг учурунда саламаттык сактоо министринин орун басары Нурболот Үсөнбаев айтып берди.
Белгилей кетсек, коронавирус жуктургандардын арасынан Ош облустук бириктирилген ооруканасында 59, 55 жаштардагы эки киши (бири медицина кызматкери) жана Нарын облустук ооруканасында 84 жаштагы бир адам көз жумду.
Министрдин орун басарынын айтымында, медицина кызматкери апрель айынан бери коронавирус жуктуруп алгандар менен иштеп келген.
"Вирус аны эки тараптуу пневмонияга чалдыктырган. Негизи өзүндө кант диабети, жүрөк оорусу бар экен. Анын үстүнө кан басымы бийик жүрүптүр. Экинчи бейтап 55 жашта эле. 22-майдан бери ооруканада дарыланып жаткан. Былтыр жүрөгүнө операция жасаткан экен", — деди Үсөнбаев.
Ал эми үчүнчү оорулуунун эски дарттары козголуп, 25-майдан тарта абалы кескин начарлап кеткен. Кан басымы өтө бийик болгону айтылды.
Жалпы каза болгондордун саны 20 кишини түздү.