БИШКЕК, 26-май — Sputnik. Кыргызстанда мамлекеттик кызмат көрсөтүүлөр боюнча уникалдуу мобилдик тиркемелер иштелип чыкты. Бул тууралуу Мамлекеттик каттоо кызматынан билдиришти.
Алардын аталышы — iGov жана Sanarip ID. Ошондой эле эми кыргызстандыктар санарип айдоочулук күбөлүк жана булут санариптик кол тамгасын колдоно алат.
Тиркемелер Android жана iOS операциялык системаларынын базасында иштейт.
Мамкаттоо кызматынын төрагасы Акын Мамбеталиевдин айтымында, iGov — Борбор Азия өлкөлөрүнүн ичинен мамлекеттик органга тиешелүү алгачкы тиркеме.
Бул система азырынча мамлекеттик кызматтарды, келечекте банк жана башка жеке тартиптеги электрондук кызматтарды пайдаланууга шарт түзөт.
"Смартфондогу санарип айдоочулук күбөлүктө уникалдык QR-код болот. Аны ачкан сайын үч мүнөткө автивдүү болуп турат. Бул аралыкта жол инспекторлору аны планшет аркылуу текшеришет", — деп айтылат билдирүүдө.
Мамлекеттик каттоо кызматы бул тиркемелерди тесттик режимде ишке киргизип жатканын билдирип, ага катышууну каалаган бардык жарандарды кызматташууга чакырат. Тесттик режим аяктаганга чейин жаран тиркеменин ишин жакшыртуу боюнча өз сунуштарын бере алары айтылды.