ОШ, 10-май - Sputnik. Бүгүн, 10-май күнү, Баткен районунун Көк-Таш айылынын Төрт көчө участкасында Баткен жана Согду облустарынын өкүлдөрү жолукту. Алар Кыргызстан менен Тажикстандын тактала элек аймактарында курулуш иштерин жүргүзбөө, жер айдап эгин эгүү сыяктуу жумуштарды убактылуу токтотуп турууну макулдашты. Бул тууралуу өкмөттүн Баткен облусундагы өкүлчүлүгүнүн маалымат катчысы Чолпон Бердикулова билдирди.
Тажикстан тараптан Согду облусунун аткаруу бийлигинин төрагасынын биринчи орун басары Анвар Яъкуби, Исфара райадминистрация башчысы жана күч түзүмдөрүнүн жетекчилери келген.
Тараптар чек аралаш аймакта чыр-чатактын алдын алуу, пикир келишпестиктерге жол бербөө, эл арасында түшүндүрүү иштерин жүргүзүү боюнча сүйлөшкөн.
Анда чек аралаш аймакта жашаган элдин коопсуздугун сактоо маселеси коюлган. Коронавирус илдетинин жайылып кетүү коркунучун алдын алуу үчүн эл көп жашаган айылдарда милиция кызматкерлеринин жөө кайгуул күзөтүн күчөтүүнү макулдашкан.
Ал эми буга чейинки кол коюлган макулдашууларга ылайык, кыргыз-тажик чек арасынын тактала элек аймактарында курулуш иштерин жүргүзбөө, жер айдап эгин эгүү сыяктуу жумуштарды убактылуу токтотуп туруу чечимине келишти.
Чатактын чыгуусуна себеп болгон тактала элек аймактар боюнча эки өлкөнүн чек арасын делимитациялоо жана демаркациялоо маселесин Өкмөттөр аралык комиссиясы гана чече тургандыгы айтылды. Маселенин коронавирус илдети боюнча кырдаал турукташканда гана эки тараптуу жолугушууда карала тургандыгы белгиленди.
Баткендеги окуя
8-майда кечке жуук Кыргызстан менен Тажикстандын чектешкен аймагындагы жергиликтүү жашоочулар Баткен районунун Чек айылында 50 сотых жерди талашып, жаңжалдаша кетишкен.
Анын кесепетинен кыргызстандык үч чек арачы, бир жай тургун жаракат алган.
Окуя боюнча эки өлкөнүн ТИМ башчылары, вице-премьерлери, облустагы өкүлдөрү, Чек ара кызматынын өкүлдөрү сүйлөшүп, бир пикирге келишкен. Учурда дагы сүйлөшүүлөрдү жүргүзүп жатышат.
Кырдаалга байланыштуу Кыргызстан тышкы иштер министри тажик тарапка нааразычылык нотасын тапшырган.