БИШКЕК, 3-май — Sputnik. Буга чейин Ош облусу жана шаары боюнча коронавирус жуккандар менен байланышта болуп, үй карантининдеги 15 аял төрөдү. Бул туурасында Саламаттык сактоо министрлигинен кабарлашты.
"24-мартка карата оорулар менен карым-катнашта болгон кош бойлуулардын саны 72 болчу. Эми 1-майга алынган маалыматтар боюнча, 45 аял", - деп айтылат министрликтин маалыматында.
Аларга адистер онлайн-кеңештерди берип турган. Ал эми айы-күнү жеткенде обсервациядагы төрөт бөлүмүнө жеткирилген.
Ош облусунда кош бойлуу аялдарга жардам көрсөтүү боюнча кызматтын координатору, акушер-гинеколог Гүлбара Ташиева COVID-19 кырдаалынан улам стационардык кызмат көрсөтүү боюнча эки жай ачылганын айтты.
Бири – коронавируска шектелип келген кош бойлуулар жайгаштырыла турган, экинчиси – илдетти жуктуруп алган боюнда бар аялдар жата турган бөлүм.
Ал ошондой эле бүгүнкү күндө Ош аймагы боюнча COVID-19 диагнозу менен төрөгөн аялдар боюнча учур каттала электигин кошумчалаган.
Кыргызстанда бүгүн дагы 26 адам вирус жуктуруп, алардын жалпы саны 795ке жетти. Буга чейин 10 адам каза болду. COVID-19 алып кеткендердин ичинде медицина кызматкери да бар.
Кыргызстанда коронавирус тууралуу соңку маалыматтарды Sputnik Кыргызстандын тексттик баяндамасынан окуп туруңуздар.