БИШКЕК, 17-апр. — Sputnik. Санитардык-карантиндик эрежени сактабаганы аныкталса, Ат-Башы районундагы эки дааватчыга да кылмыш иши козголот. Бул тууралуу Нарын шаары жана Ат-Башы районунун коменданты Уланбек Аалиев маалымат жыйын учурунда билдирди.
Буга чейин Нарын шаарына Пакистандан дааваттан келип, коронавирус илдетине чалдыккан жаранга санитардык-карантиндик эреже сактабагандыгы үчүн кылмыш иши козголгон. Учурда тергөө жүрүп жатат. Бул киши азыр айыгып, үйүнө чыкты.
"Эгер Нарын шаарындагы тартипти сактабаган жаранга окшоп санитардык-карантиндик эрежелерди бузушкан болсо, анда бул эки жаранга да кылмыш иши козголот. Азырынча тактоо иштери жүргүзүлүп жатат", — деди Аалиев.
Учурда бул адамдар менен байланышта болгон Ат-Башы районундагы 27 адамдан коронавирус аныкталып, алар райондук ооруканада дарыланышууда.
Маалымат жыйын учурунда Аалиев Нарын шаарында коменданттык саатта алты жаран тартип бузгандыгын айтты. Алардын бешөө мас абалында болгон. Анын бири ичип алып автоунаа башкарып жүргөндүктөн, 17500 сом өлчөмүндө айып пул салынып, автоунаасы айып короого токтотулгандыгы маалым болду.
Коронавирустун кесепети
Кыргызстанда коронавируска кабылгандардын саны 489га жетип, анын 114ү айыгып чыкты. Арасында 116 медицина кызматкери да вирус жуктуруп алган. Оорунун кесепетинен беш адам каза тапты.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.