БИШКЕК, 1-апр. — Sputnik. Саламаттык сактоо министрлиги "КРде бардык обсервация жайлары жабылды" деген маалыматты төгүндөдү.
Буга чейин мындай билдирүү соцтармак жана мессенджерлерге тарап кеткен. Анда "ооруп калган адамдар үй карантининде эле болот, ал эми ооруканаларга дене табы аябай көтөрүлгөн жарандар гана жаткырылат" деп айтылат.
Саламаттык сактоо министрлиги обсервация азыркы алгоритм боюнча чет өлкөдөн келген жарандардын ден соолугун текшерүү үчүн керектигин айтты. Алар үч күн обсервацияда жатып, андан кийин дарыгерлердин көзөмөлүндө үй карантинине чыгат. Эгер шек санаган белгилер байкалса, анда ооруканага жаткырылат.
Коронавирус менен күрөшүү үчүн түзүлгөн штабдын бүгүнкү маалыматы боюнча, Ысык-Көл облусунун Түп районуна чет өлкөдөн келген сегиз жаран үй карантинин бузганы үчүн күч менен обсервацияга киргизилген.
Коронавирус Кыргызстанда
Бишкек, Ош, Жалал-Абад шаарларында жана Сузак, Ноокат, Кара-Суу райондорунда 15-апрелге дейре өзгөчө абал жарыяланган. Кечки саат 20.00дөн 7.00гө чейин коменданттык саат киргизилди.
Ушу тапта өлкө ичинде абал кандай болуп жатканын Sputnik Кыргызстан жүргүзгөн тексттик баяндамадан билүүгө болот.