БИШКЕК, 29-мар. — Sputnik. Жалал-Абад шаарына күндүз коменданттык саат киргизилди деген маалымат жалган. Бул туурасында Жалал-Абад облустук милициясынын маалымат кызматы билдирди.
Буга чейин социалдык тармакка Жалал-Абад шаарына кечкисин гана эмес, күндүз дагы коменданттык саат киргизилди делген видео тараган.
Тасмадан "Мына, коменданттык саат башталды, баарын кармайт экен. Чыкпагыла, кошуналарга айткыла!" деп сүйлөп жаткан кишинин үнүн угууга болот.
Облустук милициянын маалымат кызматы коронавирус жуктургандардын соңку статистикасынан кийин текшерүү иш-чаралары күчөтүлгөнүн белгилешти.
"Себепсиз көчөгө чыгып алгандар да болуп жаткандыктан текшерүү күчөтүлдү. Коменданттык сааттын эрежеси өзгөргөн жок, кечки саат 20:00дөн эртең мененки 7:00гө чейин сыртка чыкканга болбойт", — дешти милициядан.
Коронавирус Кыргызстанда
Бишкек, Ош, Жалал-Абад шаарлары менен Сузак, Кара-Суу, Ноокат райондоруна өзгөчө абал киргизилип, кечки саат 20:00дөн кийин көчөгө чыгууга тыюу салынган. Мындай режим 15-апрелге чейин уланат.
Ушу тапта өлкө ичинде абал кандай болуп жатканын Sputnik жүргүзгөн тексттик баяндамадан билүүгө болот.