БИШКЕК, 25-фев. — Sputnik. Быйыл инфляциянын деңгээли 5 пайыздан ашпай турганы божомолдонууда. Бул тууралуу Улуттук банктын маалымат кызматынан кабарлашты.
Февраль айынын орто ченине чейин инфляциянын жылдык деңгээли (2019-жылдын февраль айына салыштырмалуу) 3,9 пайызды түздү. Азык-түлүктүн баасынын жогорулашы жалпы баанын деңгээлине инфляциялык басым жасап жатат.
Улуттук банктын маалыматына караганда, Кыргызстандын экономикалык жактан өнүгүшү дагы деле тышкы экономикалык шарттардан көз каранды. Кыргызстандын соода-сатык жаатындагы негизги өнөктөшү болгон мамлекеттерде экономикалык активдүүлүк сакталып турат.
"Орточо эсеп боюнча бир жылдык инфляция 4,6 пайызды түздү. Ал эми жылдын аягына карата инфляция 5 пайызга чейин болору божомолдонуп жатат", — деп айтылат маалыматта.
Белгилей кетсек, Улуттук банк сырткы таасирлерди эске алуу менен кредиттин эсептик чен өлчөмүн беш пайызга чейин көтөрдү.