АЛМАТЫ, 31-янв. — Sputnik. КР премьер-министри Мухаммедкалый Абылгазиев Amazon Web Services компаниясынын өкмөттүк трансформация боюнча жетекчиси Лиам Максвелл менен жолукту. Бул тууралуу өкмөттүн маалымат кызматы кабарлады.
Жолугушуу учурунда өкмөт башчы Amazon Web Services компаниясынын ишмердүүлүгү акыркы он жылда экономиканы өнүктүрүүдө үлгү болгонун баса белгиледи.
"Санарип технологияны киргизип, колдонуп жана аны экспорттоо боюнча Кыргызстан өзүнө аймактык лидер болуу тапшырмасын койду. Өлкөнү санариптештирүү Кыргызстандын экономикасын өстүрүп, элдин жашоосун жакшыртат деп ишенебиз.
Кыргызстандын экономикасында өсүш байкалып, элдин жашоосу жакшырарын билебиз. Мындан улам ийгиликке жеткен компаниялар менен кызматташалы деп жатабыз", — деди Абылгазиев.
"Азыркы тапта өзүбүздүн дата-борбордун курулушунун пайдубалы түптөлдү. Өлкөдө Amazon компаниясынын да дата-борборунун болушуна кызыкдарбыз",— деди өкмөт башчы.
Amazon Web Services компаниясынын өкмөттүк трансформация боюнча жетекчиси Лиам Максвелл өз кезегинде кыргыз тарап менен негизги багыттар боюнча кызматташууга даяр экенин билдирди. Ошондой эле өнөктөштүктү өнүктүрүү үчүн адистерди окутуу долбоорлорун ишке ашырууга кызыкдар экенин айтты.
Эске салсак, премьер-министр Мухаммедкалый Абылгазиев Алматы шаарында Евразия өкмөттөр аралык кеңешинин кезектеги жыйынына катышып жатат.