Жаңы түзүлгөн медиа борборлор өлкөнүн 40 районун камтыйт. Башкы кеңсеси облус борборунда жайгашып, ал беш багытта иш алып барат. Бул тууралуу Бектур Ибрагимов Sputnik Кыргызстан радиосунун эфиринде маек куруп жатып билдирди.
Анын айтымында, аталган борбордун түзүлүүсү менен райондук гезиттер жабылып калбайт.
"Жаңы медиа борбор аймактардагы ЖМКлардын ишин оптималдаштырууну көздөйт. Максаты — элге сапаттуу маалыматтарды ыкчам жеткирүү. Медиа борбордун облустук телевидение, сайт, пресс-борбор, эгер мүмкүнчүлүгү болсо радиосу жана гезити болот. Бирок райондук гезиттер жабылып калат деген туура эмес. Анткени бир облуста буга чейин канча гезит чыгып келсе, алар иштей берет. Болгону ар бир райондон экиден кабарчы калып, алар өз аймагындагы маалыматтарды облустагы медиа борборго жөнөтүп турат. Райондук гезиттерде мурда кароолчу, тазалык адиси сыяктуу штаттык бирдиктер да сакталып келе берген. Мына ушулар кыскартылып, ордуна веб-дизайнер, бильд-редактор сыяктуу жаңы адистиктер киргизилет", — деди Ибрагимов.
Ал медиа борбор алгач Чүй облусунда ачыларын, учурда уюштуруу иштери 90 пайызга бүтүп калгандыгын кошумчалады.