Тилекке каршы, Кыргызстан 0:2 эсебинде утулуп калды. Анткен менен кыргызстандык оюнчулар татыктуу оюн көрсөтүп, стадионго келген күйөрмандарды көңүл кош калтырган жок. Кыргыз оюнчулары оюндун башында үстөккө-босток чабуулга өттү. Тилекке каршы, андан майнап чыккан жок.
Кыргызстандын курама командасынын машыктыруучусу Александр Крестинин да оюнчулар жакшы оюн көргөзгөнүн айтып, күчтүү команда менен болгон беттеш бир топ тажрыйба бере турганын белгилеген.
Sputnik Кыргызстан агенттиги Бишкек шаарында өткөн мелдеш тууралуу япониялык басылмалар кандай маалыматтарды жазганын билип көрдү. Басылмаларга чыккан маалыматтарды жазууда Японияда жашаган Чыңгыз Сүйүнбек уулу жардам берди.
Soccerdigestweb басылмасынын эксперти Кенсуке Хонда япон курамасынын кыргыз футболчулары менен болгон оюнуна баа берген. Ал өз макаласында япон оюнчуларынын ичинен дарбазачыга эң жогорку баа берип, аны команданын сактоочусу деп атаган. Бул тууралуу ал мындай деп жазган:
"Футбол талаасында оюн татаал болду. Япон курамасы катары менен төртүнчү жолу жеңишти камсыздады. Бирок бул комплимент эмес. Себеби оюн өтө оор болду, футбол талаасынын абалы начар болгондуктан топту таамай тебүү кыйынга туруп, алыска пас берүү дээрлик болгон деле жок. Шуичи Гонда 31чи жана 67-минуталарда албууттанган кыргыз футболчуларынын коркунуч жараткан эки соккусун жокко чыгарды. Бул кадамы менен ал өз оюнун таба албай жардын кырында турган япон курамасына дем берип, аны утулуудан сактап калды.
NHK басылмасы Япония үчүн оюндун ритмине кирүү өтө оор болгонун жазды. Футбол талаасынын чөп өспөгөн жерлеринде япон футболчулары көп жаңылып жатышты. Бирок биринчи бөлүктүн аягында каршылаштардын дарбазачысы эреже бузгандыктан кыргыз тараптын дарбазасына пенальти дайындалганын жазган. Жарым коргоочу Такуми Минамино бул мүмкүнчүлүктү колдон чыгарбаганына токтолгон.