БИШКЕК, 27-окт. — Sputnik. Америкалык Warner Bros студиясы тарабынан тартылып жаткан "Том жана Жерринин" толук метраждуу тасмасы 2020-жылы 23-декабрда көрсөтүлөт. Бул туурасында "Известия" THR порталына шилтеме берип жазды.
Маалыматка ылайык, буга чейин тасманын 2021-жылы жарыкка чыгары айтылган. Бирок кино тартуучулар эртерээк бүтүрүүнү туура көрүшкөн.
Картинанын сюжети боюнча Том Нью-Йорктогу заңгыраган отелде жашайт. Ал жакка Жерри дагы көчүп келип, жоруктары жана тамашалары менен салтанатты бузганга аракет кылат. Натыйжада мейманкананын кызматкери Томдун чычкандан кутулушу керектигин айтат.
Тасмада Хлоя Морец, Майкл Пенья, Кен Джонг, Роб Делани жана башка актёрлор роль жараткан.
Том аттуу мышык жана Жерри деген чычкан — мультфильмдин каармандары. Ал серияны 1940-жылдары режиссёрлор Уильям Денби Ханна менен Жозеф Барбера тартып баштаган.